في البداية لازم نفهم حقيقة إنك تظهر في الصفحة الأولى أو حتى التانية ده مش مجهود الكونتت لوحده😁، ده مجهود فريق كبير جدًا بداية من صاحب الموقع أو المؤسسة في الرؤية الواضحة اللي بيمتلكها والتعامل السهل واللطيف مع الموظفين. 🤷♀️
بجانب الدور المهم والأساسي للمصمم والمبرمج اللي ليهم دور كبير في تحسين تجربة المستخدم، ودور القائد الـ SEO اللي دوره يوجه ويختار الاستثمار الأمثل في اختيار الكيوردز وحاجات تانية كتير.🙄
دلوقتي انت فهمت إن الكونتت بتاعنا ليه دور كبير طبعًا، لكن باقي التيم دوره ميقلش أهمية عن الكونتت، دي معلومة أساسية حبيت أبدأ بيها، طيب دلوقتي إزاي اكتب مقالة مختلفة وجوجل يبصلها بنظرة رضا واحتمالية انها ترانك تزيد؟ يلا بينا نشوف مع بعض. 🤩
1- حمل Extension Goggle translate ببساطة هتكتب اسم الاكستنشن في جوجل وتحملها وتفعلها، وتخلي الاختيار إنك اما تضغط دبل كليلك على أي كلمة بالإنجليزي يظهرلك معناها.
2- بتاع الـ SEO هيديلك الكيورد اللي هتشتغل عليها، دورك انك متكتفيش بيها سواء بعتلك LSI keywords أو كلمات مرادفة أو مدهالكش، انت كمان ممكن تدور عليهم لأنهم هيساعدوك جدًا، هتجيبهم منين؟🤔
مثلاً لو افترضنا انك هتكتب عن التصميم الداخلي، يبقى تكتب الكلمة المفتاحية في البحث وتشوف الكلمات ذات الصلة أو اللي جوجل بيكملهالك لما تكتبها في السيرش بار وتسجلها معاك، أو لو معاك جوجل بلانر استعين بيه هيظهرلك الكلمات المساعدة. 👌
3- تفتكر جه وقت إنك تبدأ تكتب🤩؟ هقولك لأ لسه مش دلوقتي، حاليًا انت معاك الكلمة المفتاحية، هتبحث عنها بالعربي وتقرأ كل المعلومات اللي اتكتبت عن الكلمة دي ومفيش مشكلة إنك توصل للصفحة الـ 10 في جوجل، ولو انت موقع جونيور لسه بتقول يا هادي لازم تغطي كل الأسئلة اللي بتكلم عن الكلمة المفتاحية بتاعتك تمام؟
4- هتكتب دلوقتي؟🤩 لأ بردو مش دلوقتي، انت حاليًا عرفت كل صغيرة وكبيرة في الكلمة المفتاحية اللي هتكتب عنها، دورك بقى انك تكتب المرادف بتاع الكلمة المفتاحية بالانجليزي وتكتبها في الموقعين دول👇:
a. AlsoAsked: People Also Ask keyword research tool | AlsoAsked
b. https://lnkd.in/dQGHtU67
5- كل اللي عليك انك تكتب مرادف الكلمة المفتاحية بالإنجلش في الموقعين اللي فوق دول، وتبدأ تجمع المادة اللي هتبدأ تشتغل عليها في مقالتك، وأداة جوجل ترانسليت معاك لو في أي كلمة أو جملة مش عارفها. 😁
6- جه وقت انك تبدأ تكتب😍، دلوقتي الكي وردز معاك وكلمات LSI والكونتت المختلف اللي بيغطي كل الأسئلة اللي الناس بتسأل عنها المتعلقة بالكلمة المفتاحية معاك، إذا كل اللي عليك انك تبدأ تصنع العظمة بتاعتك على نار هادئة، واوعى تستعجل لإنك كل ما بحثت أكثر كل المقالة بقت أفضل وعظمة. 👏
7- خلصت كتابة وتوزيع محترم للكلمات المفتاحية والمرادفات والعناوين الجانبية اللي الناس بتسأل عليها،👌 مفضلش بقى غير انك تراجع المقالة أكثر من مرة، مرة للأخطاء الإملائية، مرة لعلامات الترقيم، مرة للصياغة وسهولة اختيار الكلمات، ومرة أخيرة لمراجعة المقالة بوجه عام.✌
8- المقالة كده فاضلها الصور والانفوجراف والبودكاست أو اليوتيوب، وتشوف المقالات ذات الصلة في الموضوع ده وتعملها انترنال لينك محترم بحيث تربطهم ببعض، ويبقى كده فل جدًا. 🤝
كده احنا وصلنا للنهاية وجاوبنا على سؤالنا النهاردة، وفي الأخير يهمني أعرف منك هل في خطوة تانية بتعملها تقدر تشاركها معانا؟👀 أشوفك في بوست جديد وممكت تلف لفة في سرحان للمحتوى وهتلاقي مقالات هتعجلك.